Ta vare på mangfaldet – støtt Firda og dans- og dramalina!

Sandane Utviklingslag vil uttrykkje tydeleg støtte til Firda vidaregåande skule og arbeidet med å sikre eit breitt og desentralisert vidaregåande opplæringstilbod i Nordfjord. Særleg vil vi løfte fram verdien av dans- og dramalina ved Firda.

Vi meiner dette handlar om meir enn ei enkelt utdanningslinje. Det handlar om kva slags region vi ønskjer å vere, kva moglegheiter vi skal tilby ungdommen vår, og korleis vi skal utvikle eit levande Nordfjord også i framtida.

Dans- og dramalina ved Firda er eit særmerkt utdanningstilbod som gjev ungdom høve til å utvikle seg innan kunst, kultur og sceniske uttrykk. Slike tilbod er viktige for mangfaldet i vidaregåande opplæring. Dei skaper kompetanse, engasjement og kreativitet, og dei bidreg til eit rikare kulturliv i heile regionen.

Vi må ikkje gløyme at eit godt utdanningstilbod ikkje berre handlar om dei store og tradisjonelle studieretningane. Ungdom er ulike, har ulike interesser og ulike talent. Då må vi også ha eit utdanningssystem som tek vare på dette mangfaldet. Det er ikkje alle som finn sin plass i dei mest vanlege utdanningsløpa.

Firda vidaregåande skule har gjennom mange år bygd opp eit fagmiljø og eit tilbod som har betydning langt utover Gloppen sine kommunegrenser. Det er ein kvalitet vi bør vere stolte av, og som vi må arbeide for å vidareutvikle – ikkje byggje ned.

Regionsenter eller sterke lokalsamfunn?

Rektor ved Firda vidaregåande skule, Tove Hanne Ommedal, peikar i sitt høyringsinnspel til Regional plan for areal og mobilitet i Vestland på eit viktig prinsipp: Framtidige avgjerder om kva utdanningstilbod som skal vere kvar, må byggje på ei heilskapleg vurdering og ikkje berre på regionsenterstatus.

Dette sluttar Sandane Utviklingslag seg til.

Nordfjordeid er peika ut som regionsenter i Nordfjord. Det er naturleg at regionsenteret har viktige regionale funksjonar, men det kan ikkje innebere at andre sterke tettstader skal miste tilbod og funksjonar som er viktige for utviklinga av lokalsamfunna og regionen samla.

Sandane, Stryn, Måløy og Nordfjordeid er alle viktige tettstader i Nordfjord. Dei har ulike føresetnader, ulike styrkar og ulike roller. Det må vere rom for å utvikle desse kvalitetane side om side.

Eit sterkt regionsenter blir ikkje skapt ved at andre stader blir svekte. Tvert imot er eit levande og attraktivt Nordfjord avhengig av at fleire tettstader har gode tenester, arbeidsplassar, utdanningstilbod og kulturaktivitetar.

Vi må tenkje langsiktig

Når fylkeskommunen no skal vurdere framtidas vidaregåande opplæring, må ein sjå på kva som tener ungdommen og regionen best på lang sikt. Det må handle om kvalitet, fagmiljø, rekruttering, tilgjenge og mangfald – ikkje berre om administrative grenser og plassering av regionsenter.

Å ta vare på dans- og dramalina ved Firda er å ta vare på eit viktig utdanningstilbod og ein del av den kulturelle infrastrukturen i Nordfjord.

Sandane Utviklingslag vil difor oppmode politikarane Vestland fylkeskommune til å støtte opp om Firda vidaregåande skule og sikre at dans- og dramalina også får ei framtid. Vi treng eit Nordfjord med fleire sterke tettstader, eit breitt utdanningstilbod og plass til ulike talent og interesser.

Eit levande Nordfjord krev meir enn eitt sterkt sentrum. Det krev at vi tek vare på det som gjer kvar stad og kvar skule verdifull.

Styret i Sandane Utviklingslag,

Paul-Rune Daviknes, Audun Mundal, Kim Eide, Ola Alexander Lilloe-Olsen og Eve Austrheim