Partimåling: Drivstoffkutt gjer lite for Sp og Høgre

Senterpartiet ofra budsjettavtalen med Ap, SV, Raudt og MDG for at folk skulle få billigare bensin og diesel. Det får lite utteljing på den nye partimålinga gjort av Respons Analyse for VG og Aftenposten.

Sp går marginalt fram frå førre måling på 5 prosent, til 5,8 prosent. 

– For Sp var det avgjerande viktig å få ned kostnadene for folk og næringsliv. Det vi gjorde før påske, var heilt rett, seier Sp-leiar Trygve Slagsvold Vedum til VG. 

Høgre, som stilte forslaget om kutt i pumpeprisen, går tilbake frå 18,8 prosent til 18 prosent. 

– Eg synest målinga er litt kjedeleg. Den viser jo eit ganske konstant bilete og ikkje store utslag for nokon av partia. Høgre har stabilisert seg på rundt 4 prosentpoeng over valresultatet. Det er eit godt grunnlag til å vekse vidare på, seier Høgre-nestleiar Henrik Asheim.

Frp er framleis Noregs største parti med 26,5 prosents oppslutning, ifølgje målinga. Dermed sikrar dei borgarleg fleirtal på Stortinget med 92 mandat, mot 72 mandat til raudgrøn side.

Samanlikna med førre måling fell Arbeidarpartiet 0,8 prosentpoeng. SV på si side går opp 0,2 prosentpoeng. KrF fell til liks med Raudt 0,2 prosentpoeng, medan Venstre går ned 0,5 prosentpoeng. MDG blir ståande på 3,9 prosent. (©NPK)