Kronprinsesse Mette-Marit: – Eg beklagar situasjonen som eg har sett kongehuset i

– Eg ønskjer å komme med ei djup unnskyldning for vennskapen min med Jeffrey Epstein. Det er viktig for meg å seie unnskyld til alle dykk eg har skuffa. Noko av innhaldet i meldingane mellom Epstein og meg representerer ikkje det mennesket eg ønskjer å vere. Eg beklagar også den situasjonen som eg har sett kongehuset i, spesielt kongen og dronninga, seier kronprinsessa i ei fråsegn fredag.

Vidare heiter det i ei pressemelding frå Slottet at Mette-Marit ønskjer å forklare seg meir utfyllande og fortelje meir utfyllande om det som skjedde.

– Det klarer ho ikkje no. Kronprinsessa er i ein svært krevjande situasjon. Ho håpar på forståing for at ho treng tid til å samle seg, heiter det.

Kongehuset skriv også at dei har forståing for dei sterke reaksjonane folk har på det som har komme fram dei siste dagane. 

– Kronprinsessa tek sterk avstand frå Epsteins overgrep og kriminelle handlingar. Ho er veldig lei seg for ikkje å ha forstått tidleg nok kva slags menneske han var, heiter det i pressemeldinga.