Dette seier sjeføkonomar om renta

Torsdag er det duka for endå ei renteavgjerd frå Noregs Bank. I september vedtok dei å heve renta til 4,5 prosent.

– Truleg vil det vere behov for å halde renta oppe ei tid framover, og komiteen er førebudd på å setje renta vidare opp dersom det blir nødvendig for å få prisveksten tilbake til målet på 2 prosent innan rimeleg tid, sa sentralbanksjef Ida Wolden Bache under pressekonferansen etter renteavgjerda i slutten av september.

Kva avgjerda blir, veit vi ikkje før torsdag klokka 10, men sjeføkonomane har komme med spådommane sine.

– Kan sjå ut som rentetoppen er nådd

– På torsdag vil det vere veldig overraskande om Noregs Bank gjer noko anna enn å halde renta uendra, seier sjeføkonom Kyrre Knudsen i SpareBank 1 Sør-Noreg til NTB.

Han kjenner seg sikker på at renta blir verande på 4,5 prosent, men er likevel spent på møtet torsdag. Spenninga knyter han opp mot korleis Noregs Bank vil snakke om framtida.

Torsdag held Noregs Bank eit såkalla mellommøte, som vil seie at det ikkje kjem ein ny rapport eller oppdatert rentebane. Om Knudsen sjølv skulle oppdatert rentebana, meiner han at mellom anna den styrkte kronekursen vil trekkje ho ned.

– Det er ikkje fullt like stor sjanse for renteheving. Det kan sjå ut som rentetoppen er nådd, seier Knudsen.

Han trur at Noregs Bank likevel vil halde døra på gløtt for ei ny renteheving.

– Eg trur dei er litt redde på grunn av det som skjedde i fjor då dei sa at dei skulle setje renta ned. Og det gjorde dei jo, men dei måtte snu igjen, seier Knudsen.

Kutt i horisonten?

Sjeføkonom Kjersti Haugland i DNB Carnegie ville også blitt overraska dersom Noregs Bank gjorde endringar i styringsrenta torsdag.

– Det er ei tydeleg forventning blant analytikarane og marknaden at styringsrenta blir liggjande.

Ho peikar på at Noregs Bank under rentemøtet i september uttalte at renta sannsynlegvis vil bli liggjande ei stund. Rentebana viste då ein viss risiko for heving, men utviklinga sidan den gongen peikar ikkje på ny heving. Også Haugland peikar på at kronekursen har styrkt seg.

– Prognosen vår er at styringsrenta blir liggjande på 4,5 prosent i desember og i første halvår 2027.

Styrkt kronekurs og tendensar til at forbrukarane har blitt meir varsame med pengebruken kan vere indikasjonar på at inflasjonen kan haldast nede. Tek ein fram kikkerten, kan ein kanskje sjå eit kutt i horisonten.

– Prognosen vår er at neste endring i styringsrenta kan bli eit kutt, men at det vil dryge til andre halvår neste år, seier Haugland.

Ho understrekar likevel at det er stor usikkerheit om dette, spesielt når det gjeld energiprisane.

Ho trur ikkje at renta vil komme lenger ned enn til 4 prosent dei neste tre åra.

Sprell frå Trump kan påverke

– Spådommen er enkel. Den står i ro. Det er det eigentleg ingen tvil om, seier sjeføkonom Kjetil Olsen i Nordea.

– Det blir eit ganske kjedeleg møte, trur eg.

Også i Nordea trur dei at Noregs Bank vil vente ei god stund før vi ser kutt i renta.

– Sjølv om det har komme informasjon sidan september som kan peike på at inflasjonen kjem noko ned, er han framleis godt over målet. Noregs Bank kjem til å ha is i magen når det gjeld å redusere renta, seier Olsen.

Han meiner at vi tidlegast kjem til å sjå rentekutt i slutten av 2027, men at vi sannsynlegvis må vente til 2028. Samtidig peikar han på at ingenting er sikkert med dagens usikre verdssituasjon.

– Det er mellomval i USA og kva Trump kan finne på veit ingen. Ein kan ikkje utelukke at han finn på nye sprell. Auka olje- og gassprisar kan gi nye inflasjonsimpulsar ein kan ta innover seg.

Sjeføkonomen nemner krigen i Iran, der stengingar av Hormuzsundet har bidrege til å heve oljeprisane, som eit spesielt usikkert moment.

– Mykje kan skje framover. Ein kan ikkje leggje til grunn at rentetoppen er nådd og at neste peikar nedover. Det er ikkje gitt, seier Olsen. (©NPK)