Esa ber regjeringa svare om kvifor dumping i Førdefjorden held fram

To dagar etter Høgsteretts dom mot staten, bad Esa Norge 19. juni om ei forklaring, skriv Filter Nyheter. Organet passar på at Noreg, Island og Liechtenstein følgjer reglane i EØS-avtalen.

Høgsterett slo fast at staten ikkje hadde rett til å bruke ein unntaksregel i EUs vassdirektiv, som mellom anna krev at tiltaket må tene eit samfunnsomsyn som er tungt nok til å vege opp tapet. Efta-domstolen slo i fjor fast at rein lønnsemd ikkje tel.

Likevel har både regjeringsadvokaten og klima- og miljøministeren slått fast offentleg at drifta ikkje stansar av den grunn.

Leiar Truls Gulowsen i Naturvernforbundet meiner Esa stiller svært gode spørsmål.

– Meiner Noreg verkeleg at Nordic Mining skal kunne halde fram med å forureine utan gyldig løyve? Sjølvsagt kan dei ikkje det. Vi oppmodar regjeringa til å lytte til råda frå fleire av dei leiande juristane i landet som har gått ut og sagt at dumpinga må stansast med ein gong, seier Gulowsen til NTB.

Esa ber regjeringa svare innan 3. juli på fire punkt, mellom anna om selskapet held fram med å dumpe gruveavfall og i så fall lovheimel for det.

Klima- og miljødepartementet stadfestar til avisa at dei har fått brevet og vil svare innan fristen. (©NPK)