Dommen i Førdefjordsaka kjem onsdag
Dommen i saka om mellombels stans i dumping av gruveavfall i Førdefjorden blir offentleg onsdag 15. april.
Miljøorganisasjonane Naturvernforbundet og Natur og Ungdom har saksøkt gruveselskapet Nordic Mining og krev at dumping blir stoppa fram til Høgsterett har behandla hovudsaka om utsleppsløyvet.
– Vi er optimistiske og trur på siger. Den ulovlege og skadelege gruvedumpinga må stansast inntil saka er avgjord, seier leiar i Natur og Ungdom, Sigrid Hoddevik Losnegård, i ei pressemelding.
Annonse
Organisasjonane er kritiske til ein tidlegare dom i tingretten, som lét drifta halde fram trass i at utsleppsløyvet er kjent ugyldig. Dei meiner også at høge sakskostnader bryt med internasjonale reglar for miljøsaker.
Miljøorganisasjonane meiner òg utsleppsløyvet strir mot både EØS-avtalen og EU sitt vassdirektiv. Samstundes held gruvedumpinga fram medan rettsprosessen går. (©NPK)
