Maren avslutta OL med 12.-plass

Nordfjordingen starta med fire treff på første liggande skyting, etter å ha bomma på det siste skotet, og måtte dermed gå 150 meter ekstra i strafferunden. 

Ho gjekk ut 32 sekund bak leiaren Julia Simon frå Frankrike. 

Mista magasinet

Også på andre liggande skyting blei det ein strafferunde, og Hjelmeset Kirkeeide gjekk ut på 22.-plass, 46 sekund bak Simon.

På første ståande skyting skaut Maren fem blinkar rett ned og avanserte til 11.-plass ut frå skyting, 32 sekund bak franske Océane Michelon som gjekk ut i tet.

På siste skyting pådrog Maren Hjelmeset Kirkeeide seg to bommar etter å ha mista magasinet då ho kom inn på standplass. Ho gjekk ut på 14.-plass, 59 sekund bak tsjekkiske Tereza Vobornikova som hadde teke over leiinga.

I mål var Hjelmeset Kirkeeide 1:05 bak vinnaren, Océane Michelon. Julia Simon blei nummer to, medan Vobornikova sikra seg bronsemedaljen.

- Litt dumt

- Eg synest det var kjekt å gå i dag òg, eg er eigentleg fornøgd, sa Maren til NRK etter løpet. 

Ho innrømte at magasin-missen på siste skyting kanskje påverka resultatet av den serien. 

- Det var litt dumt, men det hjelpte ikkje med to bom, heller. Det kunne ha blitt spennande viss eg hadde klart å fylle. Eg visste at eg måtte skyte fort og fylle viss eg skulle vere med, men det gjekk ikkje i dag. 

- Har vore kjempekjekt

Sjølv om ho ikkje fekk full klaff på avslutningsdistansen, har Maren Hjelmeset Kirkeeide all grunn til å vere fornøgd med OL-debuten. Ho kan reise heim med ein medalje av kvar valør etter å ha teke gull på sprint, sølv på jaktstart og bronse i stafett. 

- Det har vore kjempekjekt. Det har gått over all forventning, og eg har kosa meg kjempemasse. Eg har hatt det skikkeleg kjekt, både i konkurransar og utanom, smilte ho til allmennkringkastaren. 

- Er fullt fortent

Sambygdingane og NRK-ekspertane Johannes Thingnes Bø og Tarjei Bø sparte ikkje på rosen etter løpet laurdag. 

- Det er berre å gratulere med ein kjempemeisterskap, du har all grunn til å vere stolt av deg sjølv, heile Noreg er stolt over det du har utretta. Å bli olympisk meister er det eit fåtal som får lov til i løpet av eit liv, og det er fullt fortent, sa Johannes til Maren. 

- Tenk å byrje i sitt første OL med så mange medaljar, gull, sølv og bronse. Det ligg meget bra an til ein fantastisk karriere, supplerte storebror Tarjei.