Kvinne sikta for hyttebrann i Gulen blir framstilt for varetekt

(NPK–NTB): Politiet ber om at kvinna som er sikta etter at ei hytte brann ned på Byrknesøyna i Gulen i Vestland natt til onsdag, blir varetektsfengsla i fire veker.

Publisert

Det skriv NRK. Politiet meiner det er fare for at kvinna i 40-åra kan øydeleggja bevis eller gjera nye straffbare handlingar.

Den sikta kvinna vart avhøyrd torsdag.

– Ho vedgår ikkje straffskuld, seier politiadvokat Karoline Sandved til kanalen.

Rundt klokka 1 natt til onsdag rykte naudetatane ut etter å ha fått fleire tips om brann i ei hytte. Det vart tidleg klart at det ikkje var nokon inne i den brennande bygningen.

Då politiet kom til staden, hadde ei kvinne i 40-åra komme seg ut av den brennande hytta.

Etter avhøyr og innhenting av opplysningar på staden vart kvinna sikta for skadeverk og valdsutøving mot ei anna kvinne som tidlegare oppheldt seg der.

– I forkant av brannen var sikta i konflikt med ei anna kvinne i 40-åra på staden. Politiet mistenkjer at den sikta utøvde vald mot henne, stod det i politiloggen natt til onsdag.

Den fornærma kvinna vart send til legesjekk og har sidan fått oppfølging frå helse, skriv NRK. (©NPK)

Powered by Labrador CMS