Fotballtennis er favoritten
Born og unge i alderen 7-17 år har hatt høve til å delta på supersommar i Sandane idrettspark i regi av STIL fotball denne sommaren. Tilbodet på laurdagar er blitt svært godt motteke.
Det er sportsleg leiar i STIL, Ingmar Sægrov, som har teke initiativ til tiltaket, og han har fått med seg ni ungdomar på laget som instruktørar.
Fritt oppmøte
Hallvard Bjotveit er éin av dei.
Artikkelen held fram under annonsen.
– Kva er tanken bak supersommar?
– Supersommar er eit gratis aktivitetstilbod for dei som har lyst til å ha det kjekt saman med andre her i idrettsparken. Ofte ser ein at to-tre personar spelar fotball i lag på den eine enden av bana, medan to andre kanskje spelar saman på den andre sida. Gjennom supersommar hjelper vi dei til å ta det første steget og legg til rette for at alle deltakarane kan ha det kjekt i lag, seier Bjotveit.
Han har hatt ansvaret for å registrere deltakarane desse laurdagane med tanke på eventuell smittesporing i etterkant.
– Vi har fritt oppmøte. Difor registrerer vi ingen før dei kjem hit, berre når dei er komne, opplyser han.
Gode tilbakemeldingar
– Kva tilbakemeldingar har de fått?
– Dette er den femte laurdagen i rekkja, og eg har inntrykk av at deltakarane har det kjekt. Dei seier i alle fall at det er moro å vere med på dette. Det er eit positivt teikn at dei kjem att laurdag etter laurdag. Flest STIL-arar har nytta seg av tilbodet, men også folk på ferie har vore med, seier han.
Hallvard Bjotveit tykkjer det har vore artig å vere instruktør.
– Dei som møter opp har lyst til å spele fotball, og har ein indre motivasjon. Difor er det ikkje nødvendig å motivere dei på nokon måte, seier han.
Artikkelen held fram under annonsen.
STIL fotball har fått 100.000 kroner frå Gjensidigestiftinga til gjennomføringa av prosjektet Supersommar.
