Vedum og Stoltenberg utelukkar arveavgift
Sp vil ikkje støtte eit raudgrønt fleirtal om arveavgifta blir gjeninnført, seier partileiar Trygve Slagsvold Vedum. Ap utelukkar comeback for skatten.
– Debatten om arveavgift kan leggjast død. For det er heilt uaktuelt for Senterpartiet å gjeninnføre ei form for arveavgift, seier Vedum til NTB.
Før valet har SV, MDG og Raudt – parti som truleg må vere del av det parlamentariske grunnlaget om regjeringa skal halde fram – teken til orde for å gjeninnføre arveavgifta i ulike former.
Annonse
Også Senterpartiet må etter alt å dømme med på laget for å danne eit ikkje-borgarleg fleirtal. Men partiet vil ikkje støtte dette om det blir innført arveavgift, lovar Vedum.
– Då bryt vi, seier han.
– Det kan vi gi ein garanti på. Det blir ikkje eit fleirtal for statsbudsjett. På såkalla raudgrøn side blir det ikkje fleirtal utan oss, for vi vil uansett liggje på vippen i Stortinget, seier Vedum vidare.
Også Arbeidarpartiet utelukkar at arveavgifta kan komme tilbake.
Annonse
– Det er ikkje aktuelt for Arbeidarpartiet å innføre arveavgift. Arbeidarpartiet går tvert imot til val på eit løfte om at arveavgifta ikkje skal gjeninnførast, seier finansminister Jens Stoltenberg (Ap).
Vedum seier vidare at private bedrifter som bekymrar seg for arveavgift, berre kan leggje bort bekymringa.
– Det kjem til å skape så mykje uro og uvisse. Og det er også relativt lite inntekter for staten, så det er ingen grunn til å ta opp den debatten igjen. Den uvissa kan berre ryddast bort, seier han vidare. (©NPK)
