Vanedannande tablettar forsvunne på sjukehuset i Førde
Fleire tusen vanedannande tablettar har vorte borte frå eit medisinrom på Førde sentralsjukehus. Politiet har etterforska saka, og ein tilsett har innrømt å ha «lånt» 22 tablettar.
Men i tillegg har det forsvunne fleire tusen tablettar av vanedannande B-preparat frå medisinrommet, skriv NRK. Helse Førde stadfesta svinnet i januar, og politiet starta etterforsking. Statsforvaltaren i Vestland har oppretta tilsynssak både mot den tilsette og helseføretaket
Slutta i Helse Førde
Den tilsette har vedteke 20.000 kroner i førelegg, for å ha «lånt» 22 tablettar Paralgin forte frå medisinrommet.
Artikkelen held fram under annonsen.
Kvinna la seinare tilbake tilsvarande mengd med tablettar, som ho hadde resept på frå lege. Ho har no slutta i Helse Førde.
– For henne har det vore ei stor påkjenning å bli mistenkjeleggjort, seier advokat Lene Knapstad ved Eine advokatfirma til NRK.
– Følt seg usikre på jobb
Statsforvaltaren skriv i ei førebels oppsummering at medisinrommet har vore lett tilgjengeleg for uvedkommande. Fagdirektør Asle Kjørlaug i Helse Førde seier at det førebels ikkje er innført akuttiltak, men at helseføretaket er i gang med ein større gjennomgang av systema og rutinane.
Helse Førde skriv i eit brev til Statsforvaltaren at svinnsaka har ført til at dei tilsette vart usikre og nærast byrja å skule på kvarandre.
«Fleire har også følt seg usikre på jobb, både i høve kollegaer og om ein til dømes sjølv er mistenkt av andre», skriv ein av direktørane. (©NPK)
