Sommar kjem til heile landet: – Helga blir bra
Denne veka kan det bli heile 30 grader i delar av Sør-Noreg. Til helga og neste veke kryp varmen vidare nordover.
Varm luft frå hetebølgja som har herja i Europa den siste veka, smittar over til Noreg i veka framover.
Gradestokken er venta å krypa opp til 27 grader fleire stader, og ifølgje vakthavande meteorolog Tone Christin Thaule i Meteorologisk institutt kan det til og med bli 30 grader nokre stader.
Annonse
– Det er i så fall på Austlandet, men me får sjå. Det skal bli varmt i Sør-Noreg sør for Stat, men så flyttar varmen seg nordover i helga og inn i neste veke, seier ho til NTB.
Heile landet
I Oslo viser prognosane på yr.no at det blir 25 grader allereie frå tysdag, medan på laurdag er det meldt 29 grader.
Gradestokken kryp over 20 grader i vestlandsbyane Bergen og Stavanger først på fredag, og så er det meldt høvesvis 27 og 24 grader i helga.
Annonse
I Trondheim er det meldt rundt 20 grader og skyer fram til helga, medan på søndag og måndag skal det bli 27 og 28 grader i bartebyen.
Ifølgje meteorologen når varmen Troms og Aust-Finnmark i helga, medan resten av nord får varmare dagar neste veke.
I Tromsø er det først meldt over 20 grader på søndag.
Åtvaring om tore
Omsider kjem altså sommarvarmen til heile Noreg, ifølgje meteorologen, som likevel kjem med eit åtvaring.
– Byeaktiviteten held fram, seier Thaule.
Annonse
Ho varslar moglegheit for tore på Vestlandet i dag og periodar med regn fleire stader.
– Men helga blir bra.
Så spørst det om me kjem til å oppleva ei hetebølgje i Noreg òg. For at det skal reknast som ei hetebølgje, må det vera målt 27 grader i fem dagar på rad.
– Det er jo juli, så det er ikkje unaturleg at det blir varmt. Men det pleier ikkje å vera varmt lenge, så me får sjå korleis det blir, seier meteorologen. (©NPK)
