Slik blir dei raude dagane neste år

Medan påska, pinsen og Kristi himmelfartsdag fell på dei same vekedagane kvart år, hoppar resten av heilagdagane rundt i kalenderen. I år starta det nye året på ein onsdag, i 2026 blir det på ein torsdag. Dermed blir juleferien forlengd fram til 5. januar for dei fleste av skulebarna i landet.

Klokkestillinga følgjer òg ein fastsett rytme, og i 2026 stiller me fram til sommartid den 29. mars, og tilbake til vintertid 25. oktober.

Skulane tek som vanleg vinterferie i slutten av februar og tidleg mars, medan påskeferien fell i veke 14, altså i byrjinga av april. 1. påskedag er den 5. april.

Må på skulen på søndag

Den første moglegheita for ein inneklemd dag i år – ein favoritt for mange – kjem nokre veker seinare. Arbeidaranes dag 1. mai – eller «offentleg høgtidsdag», som den offisielt heiter – fell på ein fredag. Dermed får mange høve til å pakka kofferten torsdag 30. april og snika seg til ein hytte- eller storbyferie fram til måndag morgon, midt under den vakraste delen av våren.

Kristeleg himmelfartsdag fell som vanleg på ein torsdag, 14. mai, og det blir truleg mange planleggingsdagar og tomme kontorstolar på fredagen. 1. og 2. pinsedag er vel ei veke seinare, 24. og 25. mai

Men så var det den dårlege nyheita for skulebarna i landet. For andre året på rad fell 17. mai – dagen utan undervisning, men med oppmøte på skulen – i helga. I år var det på ein laurdag, i 2026 blir det på ein søndag. 

Jula sklir over i helga

Det er mange månader utan heilagdag på sommaren og hausten, men der finn me til gjengjeld mesteparten av årets skuleferie. Siste skuledag før sommarferien er omkring fredag 20. juni, og deretter vender elevane tilbake rundt midten av august. Haustferien til skulane skjer i veke 40 og 41, og varierer frå fylke til fylke.

Det som blir betrakta som fellesferien, ut frå definisjonane til Fellesforbundet og NHO Byggenæringen, fell frå 6. til 24. juli, skriv Timeanddate. Den norskeigde nettstaden er det største i verda innan tid, tidssoner og himmelevenement. 

Fellesferien pleidde å vera perioden der heile bedrifter og næringar stengde dørene. I dag er det i hovudsak byggjebransjen som stansar drifta, men det er uansett langt på veg den travlaste sommarferieperioden.

På slutten av året byrjar juleferien rundt 18. desember. Julaftan 24. desember fell på ein torsdag, og det betyr at 1. juledag er på ein fredag og 2. juledag ein laurdag. Det er verdt å hugsa at julaftan offisielt berre er ein halv fridag.

Heilagdagsapokalypse i 2027

Om ein tykkjer 2026 hadde for dårleg heilagdagsfangst, er det berre å grua seg til 2027. Då fell nemleg 1. mai på ein laurdag, 17. mai i pinsehelga, og 1. og 2. juledag i ei helg. 

Me deler mange heilagdagar med dei nordiske naboane våre, men ikkje alle. Svenskane er i år uheldige med nasjonaldagen 6. juni, som fell på ein laurdag. Til gjengjeld har dei fri på midtsommardagen. 5. juni er grunnlovsdagen til danskane, og er fridag for mange – men ingen offisiell heilagdag.

Britane og amerikanarane har bunde opp dei fleste av heilagdagane sine til visse vekedagar, men for amerikanarane er det eit par sentrale unntak. I 2026 fell nasjonaldagen 4. juli på ein laurdag, medan veterandagen 11. november er på ein onsdag. (©NPK)