Sanitetskvinnene vil byggje helikopterplass i Bremanger
Bremanger Sanitetsforening har brukt koronaepidemien til planleggingsarbeid av ein helikopterlandingsplass i bygda.
– At Bremanger manglar ein skikkeleg helikopterlandingsplass har vore diskutert i årevis. Men no er vi klar til å gjere noko med det, seier leiar Reidun Torvanger i Bremanger Sanitetsforening til Firdaposten.
– Vi har snakka med erfarne pilotar i luftambulansetenesta for å finne ut kva som må til for å kunne ta ned også dei nye store redningshelikoptera. Vi kjenner alle til korleis beredskapsutviklinga er i bygdene no og du veit aldri kor tid det trengst helikopter i livreddande oppdrag, fortel ho.
Artikkelen held fram under annonsen.
I tillegg til å sjekke ut tekniske og operative krav til ein landingsplass, har sanitetskvinnene også skaffa ein leigeavtale på aktuell tomt og fått ein entreprenør til å sjekke grunnen og kor omfattande arbeid som må til for å kunne byggje helikopterlandingsplassen.
No søkjer dei òg kommunen om dispensasjon frå gjeldande reguleringsplan.
(©NPK)