Regjeringa vil stramme inn reglar for datasenter

– Datasenternæringa må førebu seg på at forventingane og krava frå samfunnet kjem til å auke. Det kan til dømes vere auka krav til lokal verdiskaping i Noreg, seier digitaliserings- og forvaltingsminister Torgeir Micaelsen (Ap) til NRK.

Micaelsen seier han ikkje veit kor lang tid det vil ta å komme med eit forslag til regelverket. Tiltaka skal vere baserte på innspel frå næringa, næringslivet og andre aktørar i Noreg.

– Eg er trygg på at det er mogleg å finne ein måte å få gjort tydeleg dei forventingane vi som samfunn har, men det må vi komme tilbake til, seier Micaelsen til kanalen.

Datasenter er vi heilt avhengige av, meiner han. Han peikar på at den geopolitiske tryggingssituasjonen i verda no gjer det naudsynt for oss å vere meir uavhengige og å ha større handlefridom.

– Datasenteret er ein grunnleggjande digital infrastruktur som vi er heilt avhengige av i Noreg. Det gir oss lagringskapasitet og reknekraft som er naudsynt for digitale tenester og for kunstig intelligens, og det bidreg allereie i stor grad til verdiskaping og grunnleggjande samfunnsfunksjonar, seier Micaelsen. (©NPK)