Regjeringa opnar breiddeidretten for alle aldersgrupper

Breiddeidretten for vaksne over 20 år blir igjen opna for fullt. Det stadfesta kultur- og likestillingsminister Anette Trettebergstuen (Ap) i ei pressemelding.

– No kan barn, unge og vaksne drive med fritidsaktivitetane sine utan tilrådingar om reduserte gruppestorleikar eller krav til avstand. Eg veit at mange har lengta etter det, og dette betyr mykje for den fysiske og psykiske helsa til folk, seier Trettebergstuen.

Fleire aktørar har den siste tida teke til orde for å opne heile breiddeidretten igjen. Blant dei er idrettspresident Berit Kjøll.

I førre veke sa ho at tida var moden for å gjenopne idretten for fullt etter at den har vore nedstengd under delar av koronapandemien. Tysdag fekk ho viljen sin.

Tidlegare tiltak

Frå før var det berre toppidretten som var open for dei over 20 år, medan det i breidda har vore eit alderstak på 20 år.

Innandørsidretten har vore meir prega av tiltak, både for barn og vaksne. Der har det vore tilrådd at gruppestorleikar blir avgrensa til 20 personar, eller etter kohort.

Det har òg vore tiltak for kampar og konkurransar for innandørsidretten.

Kontakt

Tilrådingane for organiserte fritidsaktivitetar og arrangement blir oppheva, heiter det i ei pressemelding frå kultur- og likestillingsdepartementet, og den generelle tilrådinga om 1 meters avstand skal ikkje gjelde dersom kontakt er nødvendig for å gjennomføre aktiviteten.

Endringane gjeld frå klokka 23.00 tysdag kveld.

(©NPK)