Prisane steig meir enn venta i desember

Det går fram av SSBs siste tal for konsumprisindeksen (KPI) , som vart lagt fram fredag morgon.

Prisvekst er eit mål på kor mykje prisane på varer som mat eller klede, og tenester som bussbillett eller frisør, har stige over tid.

I november var han på 3 prosent for dei tolv månadene i førevegen, marginalt ned frå 3,1 prosent i oktober.

Noregs Bank og DNB anslo begge at desemberprisveksten ville liggje uendra på 3 prosent.

Matprisar trekkjer opp

SSB koplar prisauken til «betydeleg prisvekst på mat» og auka transport- og energiprisar. Matprisane fall med 1,7 prosent frå november til desember, men var stadig 5,2 prosent høgare i desember 2025 enn same månad året før.

– Vi er vande til å sjå at matvareprisane fell frå november til desember som følgje av diverse tilbod og kampanjar på julevarer. Dette såg vi i år òg. Vi så likevel at prisane fall mindre i 2025 enn året før. Dette trekte tolvmånadersveksten for både matprisane og KPI opp, seier seksjonssjef Espen Kristiansen i Statistisk sentralbyrå.

Årsveksten på passasjertransport med fly var på 4,8 prosent. Særleg prisane på utanlandsflygingar drog prisveksten oppover.

Flatare straumprisutvikling

Prisane på elektrisitet inkludert nettleige auka 6 prosent i tolvmånadersperioden, etter eit fall på 0,1 prosent frå november til desember. Dei hadde ei dempande utvikling på prisutviklinga mellom november og desember, noko SSB knyter til noregspris og straumstøtteordninga.

– I tillegg ser vi at fleire av dei ulike prisregionane til dels utliknar kvarandre. Vi må nærare 30 år tilbake for å sjå ei flatare prisutvikling på straum frå november til desember, seier Espen Kristiansen.

SSB ventar at straumkomponenten i KPI vil bli meir stabil med noregspris.

Kjerneinflasjonen (KPI-JAE) det siste året var på 3,1 prosent, opp 0,1 prosentpoeng frå november.