Ny rapport: Halvparten av åleineforeldre har ikkje råd til nok mat
Norske barnefamiliar er hardt ramma av dyrtida, og det gjeld spesielt for einslege foreldre, går det fram av ein rapport frå forskingsinstituttet Sifo.
Sifo har laga rapporten på oppdrag frå Unicef Noreg. Her slår forskarane fast at barnefamiliane har opplevd ei betydeleg forverring i levekår dei siste åra. Trass i at den offisielle fattigdomsgrensa viser ein nedgang, viser rapporten at mange familiar slit med å dekkje heilt grunnleggjande behov.
– Ei inntekt er ikkje lenger nok. Vi ser sjølve at familiar i arbeid ikkje klarer å sikre barna si deltaking i samfunnet, seier forskingsleiar Silje Lisabeth Skuland ved Sifo.
Annonse
Det kjem fram at halvparten av dei einslege forsørgjarane slit med å ha råd til nok og sunn mat til barna sine. Det betyr at mange har måtta hoppe over måltid eller late vere å kjøpe naudsynte matvarer. Dette gjeld særleg for familiar med låg inntekt og for dei som får sosialhjelp.
– Priseksplosjonen på heilt naudsynte gode som mat, straum og bustad har skubba nye grupper ut i fattigdom. Sunn mat, stabil busituasjon og deltaking i leik og fritidsaktivitetar er viktig for utviklinga til barn. Derfor gjer denne rapporten oss urolege, seier Elin Saga Kjørholt, direktør for barn sine rettar i Unicef Noreg.
Det kjem fram i rapporten at i september 2024 var berre ein av fire einslege forsørgjarar økonomisk trygge, noko som er ei forverring med 20 prosent sidan før dyrtida. Det går også fram at ein familie med barn bør ha ei inntekt over 800.000 kroner i året for å dekkje viktige behov. (©NPK)
