Noregs Bank held renta uendra på 4 prosent

– Noregs Bank har fått i oppdrag å sørgje for at prisveksten over tid er nær 2 prosent. Prisveksten har lege over målet i fleire år, og utsiktene tilseier at han vil bli høgare framover enn vi tidlegare har sett for oss. Krigen i Midtausten gjer at uvissa er større enn normalt, men vurderinga vår no er at det truleg vil vere nødvendig å setje renta opp på eit av dei næraste rentemøta, seier sentralbanksjef Ida Wolden Bache i ei pressemelding.

Noregs Banks rentekomité meiner det trengst ein meir innstrammande pengepolitikk for å få prisveksten tilbake til målet innan rimeleg tid.

– Komiteen vedtok å halde renta uendra på dette møtet. Det er stor uvisse om utsiktene, men dersom økonomien utviklar seg om lag slik vi no ser for oss, blir renta truleg sett opp på eit av dei næraste rentemøta.

Prisvekst, arbeidsløyse og krig

Wolden Bache peikar på tre punkt som har peika seg ut sidan rentemøtet i desember:

* Prisveksten har vore klart høgare enn anslått. Samtidig er det venta at lønnsveksten i år blir høgare enn anslaget i desember. Det vil truleg bremse nedgangen i prisveksten framover. På den andre sida har krona styrkt seg mykje. Ei sterkare krone vil dempe prisveksten på varer som blir kjøpte frå utlandet.

* Kapasitetsutnyttinga i norsk økonomi synest å halde seg nær eit normalt nivå. Arbeidsløysa har vore litt lågare enn anslått i desember. Bedriftene i det regionale nettverket vårt melder likevel at det har vorte litt lettare å få tak i arbeidskrafta dei treng.

* Krigen i Midtausten har ført til store rørsler i energi- og finansmarknadene. Prisane på olje og gass har auka mykje. Samtidig har internasjonale aksjeindeksar falle og rentene stige både ute og heime. Høgare energiprisar vil truleg redusere den økonomiske veksten ute og løfte prisveksten både ute og heime.

I tråd med anslaget til ekspertane

Uendra rente er i tråd med anslaget til ekspertane i forkant, som har vist til at krigen mot Iran og det etterfølgjande energisjokket, og dessutan ein standhaftig høg inflasjon her heime, har snudd på alle tidlegare prognosar og signal.

I desember anslo Noregs Bank at vi kunne sjå fram til eitt eller to rentekutt i 2026. Deretter skulle det bli ein gradvis nedgang til noko over 3 prosent styringsrente i 2028. Men både i januar og februar har inflasjonen lege høgare enn venta, noko som har ført til ei ny forventning om auka styringsrente framover.

Renta vart i fjor sett ned to gonger, frå 4,5 til 4 prosent.