No må ein bu seg på at snøen kjem
No er snart heile landet dekt av snø. Det vil lave ned over store delar av Sør-Noreg frå onsdag kveld og på torsdag. I Nord-Noreg er det allereie kvitt – her kom det 45 centimeter tysdagen.
– Vi får det første snøfallet for i år for mange av oss. Særleg må byane i Sør-Noreg førebu seg. Det er viktig å bli klar over at det kan gi vanskelege forhold. Særleg på Austlandet der det er venta ein god del nedbør, seier meteorolog Anne Solveig Andersen ved Meteorologisk institutt.
Ho legg til at ein må vere førebudd på at det kan ta lengre tid med reiser, følgje med på vegmeldingar og halde seg oppdatert.
Annonse
10 cm på Vestlandet
I nord har innbyggjarar allereie vendt seg til det kvite. Men tysdag fekk dei endå litt meir. I Nuvsvåg i Loppa kommune auka snødjupna med 45 cm i løpet av natta.
No må Sør-Noreg førebu seg.
– All snøen kjem med eit lågtrykk som kjem frå vest for Island, og som er på veg sørover mot oss. Det kjem med ganske kjølig luft.
Annonse
Farevarselet for Vestlandet er no utvida til å omfatte eit større område. Det vil seie at både Møre og Romsdal, Vestland fylke, Rogaland og delar av Agder får snø. Det gjeld frå onsdag kveld til torsdag formiddag.
– Det vil komme mellom 5 til 10 centimeter og heilt nede ved sjøen kan det komme som sludd. Men over 100 meter vil det bli heilt kvitt.
15 cm på Austlandet
Torsdag kjem nedbøren til Austlandet.
– Her gjeld varsel for snø frå torsdag morgon til torsdag kveld. Det er venta mellom 5 til 15 centimeter. I høgare område kan det komme meir, medan det kjem som sludd nær kysten.
Vegtrafikksentralen ber bilkøyrarar om å ta det roleg. Dei som ikkje har bytt til vinterdekk, må la bilen stå.
Annonse
– Har du ikkje lagt om til vinterdekk enno, må du gjere det no eller la bilen stå på torsdag, seier kommunikasjonsrådgivar Nils Sødal i NAF i ei pressemelding.
– Erfaringa tilseier at det blir lett kaotisk når det første snøfallet kjem i dette området, seier han.
Statens vegvesen seier dei følgjer vêr- og køyreforholda tett og oppmodar sjåførar til å vere merksame.
– Vi er førebudde og følgjer utviklinga tett. Sjølv om mannskapa er ute og gjer tiltak, må trafikantane rekne med at føret endrar seg når snøen kjem, seier Rune Nedgård ved Vegtrafikksentralen Aust. (©NPK)
