Mange vil safte og sylte

Er du på jakt etter bærplukkarar eller anna utstyr for å safte og sylte, er du denne sommaren ikkje åleine.

Salet av slike produkt har i sommar skote i vêret som aldri før, fortel Nationen.

Hos Jernia-kjeda har salet av safte- og sylteprodukt auka med heile 132 prosent dei tre siste månadene. Det har også vore ein stor auke i salet av utstyr til å grille, stelle i hagen og pusse opp, fortel Jernia-direktør Trygve Haldorsen.

Tendensen er den same hos byggjevarekjeda Maxbo, som har hatt salsauke heile våren og sommaren.

Tal frå betalingstenesta Klarna viser at mange under koronakrisa har valt å handle slike varer via nettet.

– Det norske nettsalet av hus- og hageprodukt auka med 71 prosent i juni og 52 prosent i år samanlikna med i fjor, fortel marknadsdirektør i Klarna Norge, Thomas Elvestad, til avisa.

(©NPK)