I morgon kjem regnet att

– Vi vil ikkje klare å klatre over 20 grader sør for Trøndelag i morgon, seier vakthavande meteorolog Charalampos Sarchosidis ved Meteorologisk institutt til NTB onsdag.

Torsdag kjem eit lågtrykk inn over Sør-Noreg. Det fører med seg regn og kjøligare luft. Fleire stader fell temperaturen med rundt 10 grader, til dømes i Oslo. Der har det vore rundt 29 grader den siste tida, men torsdag blir det 18 grader.

– Dette er vanleg norsk sommartemperatur, men ein del kaldare enn vi har hatt i det siste, seier Sarchosidis.

– Haustregn

Sjølv om sommarferien så vidt er i gang, bruker meteorologen hustrige ord om regnvêret som kjem torsdag.

– Moderat haustregn. Men heldigvis forbigåande: På fredag endrar situasjonen seg, då vinden snur til ei meir nordvestleg retning. Framleis blir det ikkje så veldig varmt i Sør-Noreg.

Vêret blir varmast i Møre og Romsdal og Nordland torsdag. Det er dei einaste stadene det blir moglegheit for over 20 grader. I Nord-Noreg blir det også ein del betre enn i resten av landet, spår han.

Regnet kan også redusere faren for skogbrann noko. Fredag skal sola kikke fram igjen.

Variabelt i helga

Vestlendingane bør finne fram paraplyen igjen, meiner Sarchosidis, dersom dei har pakka han bort i det siste.

– Det er venta ein del regn framover. Temperaturen blir ikkje så mykje å skryte av heller, rundt 13 til 17 grader. Bergen får 14 til 15 grader og regn i helga.

Også i Trøndelag, Møre og Romsdal, og dessutan enkelte stader i Nord-Noreg, kan det bli ein del skyer til helga.

– Men det blir nok betre i Nord-Noreg enn på Vestlandet. Det blir lengre periodar med sol, og ein skal klare 20 grader i Nord-Noreg i helga.

På Aust- og Sørlandet blir det nok best til helga, med over 20 grader fleire stader og ein del sol. Likevel kryp neppe termometeret over 25 grader.

Lovande for Brasil-kvelden

Når Noreg møter Brasil til åttedelsfinale i fotball-VM for herrar søndag kveld, blir det godt vêr til å feire ein historisk meisterskap, uansett resultat.

– Akkurat då ser det igjen ut som Sør- og Austlandet får det best. Så å seie skyfritt, og kveldstemperaturen blir ganske behageleg, seier Sarchosidis.

Elles i landet ser det også ganske lovande ut, meiner han. Dei einaste stadene med moglegheit for regn blir i indre strøk på Vestlandet. Mykje av regnvêret held seg ute i havet.

Gloheitt for landslaget

Norske supporterar som skal sjå Brasil-kampen i New Jersey søndag, har nokre varme dagar i vente.

– Dagane fram til det blir ganske forferdelege. Det er nok i området 40 grader no. Så eg håpar landslaget held seg innandørs under trening, i alle fall, seier Sarchosidis.

Det blir likevel litt betre på kampdagen, då temperaturen søkk til rundt 32 grader.

– Men problemet er jo at det kan dukke opp torevêr. Det kan jo skape problem dersom det lyner i nærleiken av arenaen. Det er jo veldig lokalt og forbigåande, så vi får håpe det ikkje treffer akkurat det området, seier Sarchosidis. (©NPK)