I dag blir drivstoffavgiftene kutta: – Veit ikkje kva som vil skje

– Eg trur pumpeprisane fell tilsvarande avgiftsreduksjonen i byrjinga, før dei igjen går sakte oppover, seier forskingsleiar Alexander Schjøll ved Forbruksforskningsinstituttet SIFO til NTB.

Årsaka til at prisane blir pressa opp er at tilgangen på drivstoff over heile verda blir dårlegare med Donald Trumps tollregime og krigen i Iran.

– Det er kostnader bensinstasjonskjedene må få tilbake. Dei har ein auka kostnad fordi verdien har auka, og det må òg kompenserast for, seier Schjøll.

– Me veit ikkje eigentleg kva som vil skje, ettersom me ikkje har erfaring med å kutta avgifter på denne måten, legg han til.

– Skal komma kundane til gode

Circle K opplyser til NTB at dei vil setja ned prisen tilsvarande avgiftskutta, som er 2,85 kroner per liter for diesel og 4,41 kroner for bensin, når endringa trer i kraft onsdag.

– Avgiftskutta skal komma kundane våre til gode krone for krone, seier leiar Kjetil Foyn for kommunikasjon og berekraft.

Av konkurransemessige omsyn vil han ikkje kommentera kva vurderingar som ligg til grunn for prisane på kvar enkelt stasjon.

– Me kan heller ikkje seia kva me trur om framtidige prisar, seier Foyn, som stadfestar at endringar heng saman med internasjonale innkjøpsprisar.

Under 20 kroner per liter

Tysdag var Noregs billigaste diesel til sals for 21,15 kroner per liter, medan den billigaste bensinen kosta 19,99 kroner, ifølgje ei oversikt Nettavisen har fått frå Drivstoffappen.

Viss avgiftskutta som blir innført onsdag kjem kundane til gode, kan det bety diesel til 18,30 kroner og bensin til 15,58 kroner per liter.

Avgifta på bensin er høgare enn på diesel, noko som betyr at prisskilnaden på bensin og diesel vil auka som følgje av avgiftskutta.

Regjeringa vart overstyrt

Reduksjonen i avgiftene kjem etter at Senterpartiet, saman med Høgre, Frp og KrF, sikra fleirtal for mellombels lågare bensin- og dieselprisar, og dermed overstyrte Arbeidarpartiet-regjeringa.

Finansminister Jens Stoltenberg har åtvara mot kutta og peika førre veke på at forslaget ikkje er finansiert i statsbudsjettet og vil auka oljepengebruken.

– Me går no ut frå at bensinstasjonane følgjer opp dette ved at dette er avgiftsreduksjonar som faktisk kjem forbrukarane til gode, sa han til pressa måndag morgon.

Endringane er mellombelse og gjeld til 1. september. (©NPK)