Fleirtalet vil ofre litt natur for meir kraft
Nesten halvparten av nordmenn meiner kommunen dei bur i treng meir kraft.
Det kjem fram i ei befolkningsundersøking som KS, NHO og LO har fått gjennomført, skriv Nationen.
Undersøkinga viser at berre 14 prosent av dei spurde meiner at naturen må vernast frå kraftutbygging. Samstundes meiner 2 av 3 at utbygging av fornybar energi er viktig for å ta vare på naturen.
Annonse
Ein del av dei spurde er opne for å ta av naturen for å byggje ut meir kraft til dømes gjennom vindkraft, vasskraft eller solkraft. 34 prosent svarer at dei er litt villig, med små grep, medan 13 prosent er ganske villige. 6 prosent svarar at dei er svært villige til å ta av naturen.
NHO-sjef, Ole Erik Almlid, meiner undersøkinga viser at motstanden mot kraftutbygging er overdrive og blir styrt av eit høglydt mindretal.
Samstundes splittar dei ulike typane kraftproduksjon befolkninga. 65 prosent seier dei vil oppgradere eller halde ved like allereie eksisterande vasskraft. Vidare følgjer solenergi på tak (57 prosent), vasskraft (49 prosent) og kjernekraft (47 prosent).
Ein tredjedel av befolkninga seier ja til havvind, medan 22 prosent vil ha vindkraft på land. Like mange seier ja til bakkemontert solenergi. Bioenergi får flest til å vende tommelen ned, berre 18 prosent vil ha dette. (©NPK)
