Fleirtal på Stortinget seier nei til auka grunnrente for småkraftverk

Til saman har dei fem partia 90 mandat og dermed solid fleirtal på Stortinget.

Onsdag gjekk dei saman om eit såkalla dokument 8-forslag der det heiter at grunnrenteskatten for småkraftverk skal haldast på nivået han ligg på i dag.

Dermed slår dei ned forslaget om å senke terskelen for grunnrente frå dagens nivå på 10 MWh til 1,5 MWh.

– Det er bra at parti som er samde i sak, står saman om forslag, seier Tor Mikkel Wara i Frp.

– Vi stoppar no ei overføring av verdiar frå lokalsamfunn til staten og bruker vår posisjon for å finne gode løysingar for Noreg. Det blir ingen grunnrenteskatt for småkraft med dette stortingsfleirtalet eller med Senterpartiet i ein nøkkelposisjon i norsk politikk, slår energipolitisk talsperson for Sp Maren Grøthe fast.

Forslaget har allereie møtt massiv motstand i småkraftbransjen.

– Eg er glad for at borgarleg side og Senterpartiet no står saman om å stanse forslaget. På kort tid har vi fått inn ei rekke meldingar frå heile landet om påbyrja kraftutbyggingar som stoppar opp. Fleire kraftverk risikerer også å gå i minus og gå konkurs eller måtte leggje ned, seier Aleksander Stokkebø, Høgres talsperson for energi- og miljøpolitikk.