Daudt løp for Ap og Frp i ny måling
Arbeidarpartiet aukar med 2,5 prosentpoeng, og er no jamstore med Frp på rundt 25 prosent, viser ei ny måling. Høgre slit framleis.
Arbeidarpartiet får ei oppslutning på 25,1 prosent, medan Frp noterer seg for 25,2 prosent (fram 0,2 prosentpoeng) i desembermålinga som Opinion har utført for FriFagbevegelse og Dagsavisen.
Høgre slit framleis og går tilbake med 1,6 prosentpoeng til 18,1 prosent. Det er dermed så vidt framleis fleirtal for borgarleg blokk, med 85 mot 84 mandat.
Annonse
– At Arbeidarpartiet styrkjer seg er ei god tilbakemelding frå veljarane og fint å ha med seg inn mot jula, seier Ap-nestleiar Jan Christian Vestre til FriFagbevegelse.
Raudt er det fjerde største partiet i landet med 7,6 prosent (fram 0,8 prosentpoeng). Om dette hadde vore stortingsval, hadde partiet fått 14 representantar – si største stortingsgruppe nokosinne.
SV fell med heile 2,3 prosentpoeng til 4,5 prosent. Dette er den lågaste oppslutninga for partiet sidan august 2017. Sidan valet i september har fire av ti veljarar forlatne SV.
– Vi veit vi har mykje å ta tak i. Heldigvis er det lenge til val, seier partisekretær Audun Herning.
Annonse
Senterpartiet går tilbake til 5,8 prosent (minus 0,6 prosentpoeng), medan både KrF (-0,1), MDG (-0,2) og Venstre (-0,1) ligg under sperregrensa med høvesvis 2,9 prosent, 3,7 prosent og 3,2 prosent oppslutning. Sekkeposten Andre får 3,8 prosent, fram med 1,2 prosentpoeng.
Målinga er basert på 1000 telefonintervju i perioden 8. til 15. desember, og har feilmarginar som varierer mellom 1,4 og 3,1 prosent, avhengig av storleiken på prosentresultatet. (©NPK)
