Brot i lønnsforhandlingane i byggjenæringa – kan bli storstreik
Fellesforbundet og NHO Byggenæringen vart ikkje samde i den frivillige meklinga om lønnsoppgjeret. Partane møtest dermed til tvungen mekling hos Riksmeklaren.
Fristen er ved midnatt 14. april. Blir dei ikkje samde, kan det bli storstreik i byggjenæringa.
Streikeviljen er stor, ifølgje Fellesforbundet.
Annonse
– Vi tek ut nesten alle medlemmene våre som er omfatta av Fellesoverenskomsten for byggfag allereie i første uttak. Dette vil ramme arbeidsgivarane hardt og brutalt, men vi håpar på ei løysing hos Riksmeklaren, seier forhandlingsleiar Joachim Espe.
Nær 17.000 tilsette i byggjenæringa blir omfatta av oppgjeret.
Tariffavtalen det blir forhandla om, er Fellesoverenskomsten for byggfag (FOB). Dette er ein av Fellesforbundets mest sentrale tariffavtalar og omfattar store delar av byggje- og anleggsbransjen.
I år er det hovudoppgjer, og det betyr at heile avtalen skal reforhandlast, ikkje berre lønningane for dei tilsette. (©NTB)
