Ap kraftig opp på meiningsmåling i Sogn og Fjordane
Arbeidarpartiet hoppar 4,8 prosent opp, til 22,1 prosent, på ei meiningsmåling for mai månad i Sogn og Fjordane. Resultatet ville sikra førstekandidaten plass på Stortinget om det var val i dag
Det viser ei meiningsmåling som InFact har utført for Firda, Firdaposten og Sogn Avis.
– Dette er faktisk utruleg kjekt å høyre. Eg opplever at laget vårt har blitt flinkare til å løfte fram politikken, og dreg meir i same retning. Vi får utteljing for å snakke om vår eigen politikk, seier førstekandidat Torbjørn Vereide for Ap i Sogn og Fjordane til Firda.
Artikkelen held fram under annonsen.
Senterpartiet er framleis størst i det gamle vestlandsfylket med 36,4 prosent oppslutnad, men dei går ned 3,8 prosent frå førre måling. Dei er likevel sikra to plassar på Stortinget om dette blir valresultatet.
– Dette er framleis historisk gode tal for oss, og det er svært gledeleg at Senterpartiet sikrar to mandat frå Sogn og Fjordane. Det kan vera avgjerande for å få eit regjeringsskifte, seier andrekandidat Aleksander Øren Heen for Senterpartiet i Sogn og Fjordane til Sogn Avis.