- Næringslivet i Vestland treng Høgre i regjering

Høgre heier på næringslivet som held lokalsamfunnet vårt oppe i både gode og dårlege tider. Vi er avhengige av eit sterkt næringsliv som kan utvikle seg og skape trygge arbeidsplassar, slik får vi sterke lokalsamfunn.

Ap og Støre-regjeringa har ført ein næringsfiendtleg politikk, no hastar det å få stoppe dette. Gode norske bedrifter vert kjøpte opp i stor skala av utenlandske aktørar. Skattar og avgifter er blitt så høge at det svekkar bedriftene sine utviklingsmoglegheiter, og mange norske eigarar må tappe bedrifta for å dekke formuesskatten, pengar som skulle vore brukte til maskiner og utstyr.

Samtidig som det private næringslivet slit meir enn før, veks offentleg sektor. I Norge brukar vi meir pengar på å drifte det offentlege enn Danmark og Sverige gjer. Likevel har vi dårlegare resultat på skulane våre, og dessverre har vi no under Ap og Støre-regjeringa også rekordlange helsekøar.

Samtidig går diskusjonen om store nedskjeringar i helsesektoren, skuletilboda og samferdsla. Dette er delvis grunngjeve i samansetjinga av befolkninga, vi blir eldre og ungdomen flytter til byen. Kutta er også grunngjeve i fallande skatteinntekter.

Satsing på lokalt næringsliv kan bøte på dette. Eit drivande og innovativt næringsliv skaper etterspurnad og utvikling innanfor utdanning, samferdsle, reiseliv, handel og fritidstilbod.

Høgre er garantisten for at næringslivet skal få utvikle seg. Vi vil mellom anna fjerne formueskatten på arbeidande kapital som berre rammer norske eigarar.

For nokre veker sidan var vi på Skjerjehamn og snakka med bygg og anleggsnæringa, som er ein kapitalkrevjande bransje. Dei betaler i dag høg formueskatt på maskiner og utstyr som til tider står utan arbeid, og skatten er den same om bedriftene går med underskot. Slikt skal vi ikkje ha det, dette vil Høgre endre!

At eit fleirtal i Stortinget stogga regjeringa sitt forslag om avgift på all overnatting, var veldig bra og eit godt døme på Ap og Støre si manglande forståing for næringslivet. Det lokale reiselivet konkurrerer mot globale aktørar, på vår eiga heimebane. Då må dei ikkje påleggast ekstra ulemper.

Den nye Havbruksmeldinga trugar med å bygge ned aktiviteten på Vestlandet. Høgre vil her jobbe for at næringa kan utvikle seg, og likevel stille krav til bransjen om å sikre ei berekraftig utvikling.

Vi ser gjennom denne regjeringsperioden at samhandling mellom lokaldemokrati og sentrale myndigheter er sett på prøve.

Skal vi få tilbake tilliten mellom folk, næringsliv og styresmakter, treng vi Høgre i regjering.

Liv Kari Eskeland, stortingskandidat nr. 4 for Høgre, Hordaland

Sonja Øvre-Flo, stortingskandidat nr. 2 for Høgre, Sogn & Fjordane

Ola Braanaas, stortingskandidat nr. 6 for Høgre, Sogn & Fjordane