Kristendemokratar treng ein ny politisk heimstad

Når kristendemokratar føler seg heimlause etter KrF sine politiske vegval, er det ikkje eit teikn på illojalitet. Det er eit uttrykk for integritet. No er tida inne for å byggje noko nytt – saman.

Verdibasert sentrum 

I debatten den siste tida, både i Vårt Land og andre media, har fleire spurt seg: Kvar skal kristendemokratar gå no? Nokre meiner framleis at KrF er det naturlege valet. Andre har snudd seg mot Arbeidarpartiet – ikkje fordi dei er sosialdemokratar, men fordi dei har gitt opp håpet om KrF.

Eg har sjølv gått frå KrF til Partiet Sentrum. Det handlar ikkje om bitterheit, men om politisk retning og verdimessig truverde.

Mange kristendemokratar kjenner seg ikkje lenger heime i KrF. Men dei treng ikkje vere heimlause. For oss som trur på eit verdibasert sentrum i politikken, men som ikkje lenger kjenner oss att i KrF, finst det eit alternativ: Partiet Sentrum.

Menneske først

Vi har aldri påstått at vi skal «erstatte» KrF. Vi er ikkje eit kristendemokratisk parti i klassisk forstand, men vi tek kristendemokratiets verdigrunnlag på djupt alvor. Menneskeverd, forvaltaransvar og nestekjærleik er ikkje honnørord for oss – det er styrande prinsipp for politikken vår.

Nokre meiner kristendemokratar bør støtte KrF for å få partiet over sperregrensa. Det er eit taktisk argument, ikkje eit verdibasert. KrFs utfordring er ikkje først og fremst manglande oppslutning, men vegvala dei har teke – i politiske saker, i prioriteringar og i samarbeid.

Når KrF bind seg til ytre høgre og partnarar som opnar for aktiv dødshjelp, kuttar støtte til sivilsamfunn og undergrev minoritetsrettar, så er det ikkje lenger berre usemje – det er eit grunnleggjande verdispørsmål.

Partiet Sentrum har vore tydelege: Vi vil ikkje i regjering med Frp. Vi ønskjer eit samfunn som set menneske først, ikkje marknad.

Solidaritet

Eg er også samd med dei som peikar på at «dei svake» ikkje er svake i seg sjølve. Dei er ressurssterke menneske som møter eit samfunn som ikkje ser dei. Det er ikkje dei det er noko gale med – det er systema. Difor kjempar vi mot barnefattigdom, utanforskap og sosiale skilnader. Solidaritet er ikkje veldedighet – det er rettferd.

Vi seier også nei til ny oljeleting og ja til klimarettferd – for dei som kjem etter oss, og som ikkje har stemmerett i dag. Og vi står opp for tru- og livssynsfridom, også for dei som trur og lever annleis enn fleirtalet.

Vi meiner at verdibasert politikk må ha truverde, ikkje berre tradisjon.

Til deg som kjenner deg heimlaus etter KrFs vegval – du er ikkje åleine. Du er ikkje partilaus. Velkomen til Partiet Sentrum. Her er det rom for deg, og for fellesskap, verdigrunnlag og rettferd.

Audun Mundal

Førstekandidat, Partiet Sentrum – Sogn og Fjordane