Reksnes blir ny ordførar i Stad, Kjøllesdal held fram i Stryn

Sigurd Reksnes (Sp) blir den nye ordføraren i Stad kommune.

Det er klart etter at Senterpartiet, Arbeidarpartiet og Høgre i natt blei samde om eit samarbeid. Judith M. Kvåle (Ap) vert varaordførar, skriv Fjordabladet.

Sp gjorde eit godt val i Stad og gjekk fram 5,6 prosentpoeng til 33,2 prosent oppslutning. Venstre var den store valtaparen. Partiet gjekk tilbake 27,0 prosentpoeng til 9,2 prosent.

Ein ny periode for Kjøllesdal

I Stryn er Per Kjøllesdal (Sp) sikra fire nye år i ordførarstolen etter å ha inngått avtale med Høgre. Sonja Øvre-Flo (H) blir ny varaordførar, melder Fjordingen.

Sjølv om det blei ein tilbakegang på 1,5 prosentpoeng, er Senterpartiet framleis det største partiet i Stryn med 32,5 prosent av røystene.

Høgre er nest størst med 24,2 prosent (-7,1).