Raudt fryktar prissjokk på straum – krev handling frå energiministeren
(NTB-NPK): Fyllingsgrada i vassmagasina i Sør-Noreg er på sitt lågaste sidan 2005. Raudt krev at energiministeren tek tak for å hindre eit prissjokk.
– Raudt krev at Terje Aasland kjem på banen før situasjonen blir endå meir alvorleg. Regjeringa må sørgje for at vi har nok vatn i magasina inn mot vinteren og hindre at folk, bedrifter og kommunar blir møtte med nok eit prissjokk når kulda set inn, seier Geir Jørgensen i Raudt til NTB.
Torsdag melde E24 om ei fyllingsgrad på skarve 47,7 prosent i Sør-Noreg. Det er endå mindre enn i 2022 då prisane skaut i vêret.
Annonse
Skyhøge prisar
Energianalyseselskapet Volt Power Analytics anslår prisar på mellom 130 og 137 øre per kWh til hausten i straumprisområdet NO2, som omfattar delar av Vestland, Rogaland, Agder, Grenland og delar av Telemark.
I fjor haust låg prisen på 77 øre per kWh i same område.
Samtidig held Noreg fram med å eksportere store mengder straum til utlandet, viser tal frå Statnett.
Annonse
Kan hindre eksport
Raudt vil no at regjeringa skal nytte seg av den såkalla styringsmekanismen for å avgrense eksporten. Den kan bli brukt når forsyningstryggleiken kjem under press.
Energiminister Aasland (Ap) seier til E24 at han ikkje har planar om å nytte seg av denne moglegheita. Noregs vassdrags- og energidirektorat (NVE) ventar ikkje energiknappleik kommande vinter.
– Det er naturleg at fyllingsgrada varierer frå sesong til sesong, særleg etter ein kald vinter med lite snø, høgt straumforbruk og høg kraftproduksjon. Den siste tida har det også komme lite nedbør og vore lågt tilsig i Sør-Noreg, seier han til avisa. (©NPK)
