Det er venta opp mot ein halv meter snø på delar av Austlandet dei neste dagane. Foto: Stian Lysberg Solum/NTB/NPK.

Oransje farevarsel for snø i Sør-Noreg – fleire fjellovergangar stengde

Ei rekkje fjellovergangar i Sør-Noreg er stengde eller har kolonnekøyring onsdag kveld. På Austlandet er det venta opp mot ein halv meter snø.

Fleire av dei viktigaste vegane mellom aust og vest er stengde, blant dei riksveg 7 Hardangervidda og riksveg 15 Strynefjell, skriv Vegtrafikksentralen vest på Twitter.

I tillegg er riksveg 13 Vikafjellet og fylkesveg 53 mellom Tyin og Årdal stengde, medan det er kolonnekøyring på E134 Haukeli og fylkesveg 50 mellom Hol og Aurland. Ved 18-tida var òg riksveg 51 Hemsedalsfjellet stengt på grunn av tungbilberging.

Oransje farevarsel

Meteorologisk institutt har sendt ut oransje farevarsel for snø. Det blir venta 25 til 50 centimeter snø i store delar av Oslo, Viken, Sørlandet og Vestfold og Telemark, skriv

– Vinteren gjer comeback i dag og i morgon, så eg garanterer trafikkaos på vegen i kveld og i morgon, seier statsmeteorolog Charalampos Sarchosidis til kanalen.

Ferjestrekninga Hjelmeland-Nesvik på strekninga Tau-Sand er innstilt. Det same er ferjestrekninga Rutledal-Storehaug, skriv Vegtrafikksentralen.

Åtvarar mot sterk vind

Det er òg kolonnekøyring på E134 mellom Seljestad og Horda i Ullensvang kommune.

Vegtrafikksentralen aust åtvarar bilistar mot sterk vind og snø i fjellet.

– Dette kan føre til dårleg sikt, og då kan det bli kolonnekøyring eller stengt. Planlegg turen og sjekk ut vêret og trafikkmeldingar før avreise, skriv dei på Twitter.

E6 Dovrefjell er stengd. Det er òg fylkesveg 27 ved Venabygd.

(©NPK)