No skal det ikkje lenger heite politimann
Titlar i justissektoren skal bli kjønnsnøytrale. Regjeringa foreslår derfor mellom anna å bruke polititenesteperson om både politimann og polititenestemann.
– Regjeringa foreslår fleire endringar i lovverket for å gjere titlar i justissektoren kjønnsnøytrale. Målet er eit meir moderne, presist og inkluderande lovverk, skriv regjeringa i ei pressemelding.
I lovforslaget som er fremja for Stortinget, blir det mellom anna foreslått at lensmannstittelen no også blir teken ut av lovverket. Denne tittelen er i praksis gått av bruk allereie.
Annonse
– Omgrep som lensmann, lensmannskontor og lensmannsdistrikt er allereie erstatta av politistasjonssjef, politistasjon og politistasjonsdistrikt – og dette blir det no foreslått å ta formelt inn i lovverket, skriv regjeringa.
Samtidig er det altså foreslått å byte ut politimann og polititenestemann med polititenesteperson i heile lovverket.
Tittelen namsmann skal også erstattast med den kjønnsnøytrale og allereie etablerte nemninga namsfut.
Det er Stortinget som har bede regjeringa om å sørgje for kjønnsnøytrale titlar i alle statlege verksemder.
Annonse
– Regjeringa meiner at endringane vil bidra til eit meir moderne, presist og inkluderande lovverk, i tråd med Stortingets føringar og utviklinga i statleg forvaltning, heiter det. (©NPK)
