Mann funnen etter leiteaksjon i Hyen
Det blei søndag kveld sett i gang leiteaksjon etter ein eldre mann i Hyen. Vedkomande blei vekke frå familien under ein fottur ved Åstøylen.
Mannen var sist sett i 15-tida, og etter at familien hadde etablert søk på eiga hand og leita etter han i fleire timar utan hell, blei politiet varsla like før kl. 18.30.
Redningshelikopter og leitemannskap frå Røde Kors i Gloppen blei kalla ut. Helikopteret var framme ved Åstøylen like før kl. 20, og gjorde funn kl. 20.14.
Artikkelen held fram under annonsen.
– Personen var bevisst og vaken, og vinka til helikopteret. I samråd med lege er vedkomande frakta til sjukehus i Førde for sjekk, opplyser operasjonsleiar Helge Blindheim i Vest politidistrikt like etter kl. 20.30.
Leiteaksjonen er dermed avslutta og utkalla mannskap er dimittert.