Kraftige reaksjonar på kutt i Posten: Ei politisk bestilt nedbemanning

Forbundsleiar Trude Sande i YTF viser til at forslaget om å kutte 2000 postbod for å spare 491 millionar kroner er eit løftebrot frå regjeringa som seinast i mars varsla effektivisering i posttenestene utan kutt i leveringa.

– Dette er ei politisk bestilt nedbemanning. Regjeringa kuttar oppdraget og set arbeidsplassane i fare, seier Sande torsdag.

Med forslaget vil 2000 av dei 3000 postboda i landet miste jobben.

– Ein skal ta på alvor dei innvendingane som er på det. Men det er ei grense kor lenge fellesskapen kan betale for ombering av post når nesten ingen får post, sa finansminister Jens Stoltenberg (Ap) då han onsdag forklarte innstillinga frå regjeringa og viste til at folk no i snitt får eitt brev i veka.

Tusenvis mistar jobben

– I vår var bodskapen at tilbodet ikkje skulle bli dårlegare. No foreslår regjeringa eit kutt som kan koste tusenvis av menneske jobben. Postboda har krav på å vite kvifor alternativet regjeringa sjølv peika på, er erstatta av denne spareplanen, seier Sande.

Kritikken føyer seg inn i reaksjonane frå LO og Fagforbundet som onsdag reagerte med sjokk på den varsla nedbemanninga frå regjeringa.

– Dette har vi aldri trudd skulle komme frå ei Arbeidarparti-regjering. No forventar vi at det blir rydda opp i samband med budsjettforhandlingane og vi set vår lit til samarbeidspartia, uttalte leiar Helene Harsvik Skeibrok.

Må bruke lengre tid

Fagforbundet organiserer rundt 7000 av dei tilsette i Posten/Bring. Totalt hadde konsernet vel 14.000 tilsette med vikarar og andre i heile Norden, med omtrent 10.000 i Noreg.

Også LO sentralt reagerte på kutta til regjeringa i Posten og varsla at dei vil hjelpe til med å få ei ny vurdering på bordet. LO-sjef Kine Asper Vistnes uttaler til NTB at ho ser folk i Noreg sender færre brev, men kallar kuttplanen frå regjeringa for ganske «tight».

– Det er ganske mange menneske det dreier seg om, det er ei stor omstilling og vi veit at omstillingar er krevjande. Så eg trur det ville vere klokt å sjå på om det er mogleg å gjere dette innanfor ei litt anna tidsramme enn det er lagt opp til no, på seks månader, seier Vistnes til NTB.

Motstand blant partnarane

Alle samarbeidspartnarane til Arbeidarpartiet delte reaksjonane til dei fagorganiserte på den varsla bemanningsreduksjonen. Det vil garantert bli tema når partia møtest til budsjettsamtale 6. november.

Parlamentarisk leiar i Senterpartiet Geir Pollestad sa onsdag at partiet ville kjempe mot forslaget under budsjettforhandlingane.

– Dette vil svekkje både beredskapen, distrikta og folks tilgang til nyheiter, sa Pollestad.

Raudt uttrykte uro for demokratiet dersom dei drastiske kutta i postombering blir gjennomførte.

– Levering av papiraviser er viktig for ytringsfridom og eit levande demokrati. I forslaget frå regjeringa er framtida uviss for levering av papiraviser i distrikta, særleg på laurdagar. Her hadde folk fortent at regjeringa kom med løysingar, seier stortingsrepresentant Remi Sølvberg til NTB. (©NPK)