Å ta seg ein luftetur gjennom dagen kan vere viktig for helsa i ei ekstra tung førjulstid for mange. Illustrasjonsfoto: Ørn E. Borgen/NTB/NPK.

Friluftslivsorganisasjon vil lokke folk ut med ny kampanje

Med kampanjen #1omdagen vil organisasjonen Norsk Friluftsliv få med fleire ut i kvardagen.

– Vi har ein lang vinter føre oss, med tunge dagar for mange, heimekontor, isolasjon og koronarestriksjonar. Derfor inviterer vi heile Noreg til å prøve å komme seg ut over dørstokken minst ein gong om dagen. Det gjer vi fordi vi veit at det å komme seg ut i frisk luft senkar stressnivået vårt, og gjer at vi har det betre, seier generalsekretær i Norsk Friluftsliv, Bente Lier i ei pressemelding.

Kva #1omdagen skal bestå av, kan folk bestemme sjølve.

– #1omdagen kan vere alt frå å sette seg på ein benk eller ein stubbe og få litt dagslys, til å gå seg ein liten tur, eller finne ein plass utandørs der du kan nyte kveldsmaten. Her er det berre fantasien som set grense, seier Lier.

Organisasjonane NHO og Virke har også vore ute og oppfordra arbeidsplassar til å legge til rette for at tilsette på heimekontor får ein tur ut gjennom dagen. Kampanjen til Norsk Friluftsliv er meint i som eit lite, men meiningsfullt tiltak for å betre folk si psykiske og fysiske helse i det som for mange vil bli ein spesielt krevjande vinter.

(©NPK)