s3 Strukturplast AS og TGS inngår ny leverandøravtale

Avtala har ei varigheit på tre år, med moglegheit for forlenging i ytterlegare to år.

- Ein viktig milepåle

Avtala styrkar det mangeårige samarbeidet mellom dei to selskapa og vil knyte partane endå tettare saman i åra som kjem. Strukturplast skal i avtaleperioden levere spesialutvikla produkt og løysingar basert på sin eigenutvikla polyuretan, NORSelast®, som vert brukt i krevjande offshore- og seismikkapplikasjonar.

- Dette er ein viktig milepåle for Strukturplast, og ei stadfesting på den tilliten TGS viser oss etter mange års godt samarbeid, seier Håvard André Svarstad, salssjef i Strukturplast, i ei pressemelding.

Han har forhandla fram avtala saman med Sune Vork, Category Manager i TGS.

- Strukturplast har vore ein viktig leverandør for oss gjennom mange år. Det er gjennom tett samarbeid dei gode og haldbare løysingane vert utvikla, seier Vork.

Den formelle avtala vart signert i ei uformell og hyggjeleg ramme på Sølvane Matbar på Sandane – berre dagar før restauranten opna dørene for publikum. Strukturplast og TGS var dei aller første gjestene som fekk oppleve den nye restauranten, noko som bidrog til å markere samarbeidet på ein utsøkt måte.

Internasjonal tillit

Det er ikkje berre TGS som viser interesse og har tillit til tenestene og varene som Strukturplast leverer. Strukturplast opplever stor interesse frå utlandet, og har den siste tida sikra seg fleire kontraktar med nye kundar både i USA og i Storbritannia. Strukturplast har bevisst satsa på desse marknadane og har blant anna delteke på den store oljemessa Offshore Technology Conference (OTC) i Houston dei to siste åra. 

Om ca. to veker reiser igjen representantar frå Strukturplast over Atlantaren for å vise fram kva dei kan bidra med for den internasjonale energibransjen. Som ein del av denne satsinga mot ein større internasjonal marknad, har Strukturplast dei siste åra oppgradert lokala sine på Sandane.

- Vi inviterer ofte kundar til Sandane, både for å diskutere moglegheiter og for å jobbe med konkrete samarbeidsprosjekt. Då er det kjekt å kunne vise fram nye og moderne lokale, seier Frode Lindvik, dagleg leiar i Strukturplast.

Opna prosjektkontor i Kristiansund

I tillegg til å ha oppgradert hovudkontoret og produksjonen på Sandane, opna Strukturplast også eit nytt prosjektkontor i Kristiansund i byrjinga av april.

- Dette er ein viktig strategisk lokasjon for å kome tettare på eit spennande og innovativt industrimiljø både i energibransjen, innan oppdrett og anna framtidsretta maritim næring, seier Lindvik.