Straumpriskrisa førte til kraftig fall i straumforbruket i fjor
Høge straumprisar og varmare vêr førte til at hushalda brukte langt mindre straum i fjor. Ikkje sidan 2011 har straumforbruket vore lågare.
– Varmare vêr og auka straumprisar har bidrege til lågare straumforbruk og ein overgang til bruk av ved i 2022, seier seniorrådgivar Malin Bjelvert i Statistisk sentralbyrå (SSB).
2022 er det niande varmaste året som nokon gong er registrert, og temperaturen 0,7 grader over snittet dei siste 30 åra. Det førte til at behovet for energi til oppvarming var lågare enn i 2021, som var eit relativt kaldt år, med ein kald vinter.
Artikkelen held fram under annonsen.
Straumforbruket i 2022 var med det 13 prosent lågare enn i 2021. Totalt brukte hushalda 36.347,7 gigawattimar straum i fjor. Det er det lågaste sidan 2011.
SSB skriv også at dei auka straumprisane dei siste åra har bidrege til at vedforbruket har auka. I 2022 steig bruk av ved og pellets i hushald med 6,3 prosent frå året før, og kom opp i 6,7 terawattimar, som er det høgaste nivået sidan 2012. Rundt 20 prosent av dette blir brukt i fritidsbustader.
Totalt brukte hushalda 10 prosent mindre energi i 2022 enn i 2021, medan Noregs totale energiforbruk gjekk ned med 4 prosent. (©NPK)
