Stor uvisse i norsk økonomi – renta blir halden uendra

Noregs Bank slår fast at utsiktene for norsk økonomi er meir usikre enn normalt. Inntil vidare blir styringsrenta halden på same nivå – 2,75 prosent.

– Mest sannsynleg hevar vi renta i mars, seier sentralbanksjef Ida Wolden Bache etter det siste rentemøtet.

Etter fleire rentehopp den siste tida, vel sentralbanken denne gongen å vente litt.

Dette er i tråd med kva dei fleste ekspertane trudde på førehand.

Ifølgje sentralbanken er det framleis høgt press i norsk økonomi, noko som kan bidra til å halde prisveksten oppe.

– Det kunne tilseie å auke renta på dette møtet. På den andre sida er det utsikter til lågare energiprisar enn tidlegare lagt til grunn, og dei internasjonale prisimpulsane ser ut til å minke, skriv sentralbanken.

Går gradvis fram

Men utsiktene for norsk økonomi er altså meir usikre enn normalt.

Det blir påpeika at renta er heva mykje på kort tid, og at pengepolitikken har byrja å verke innstrammande på økonomien.

– Det kan tilseie å gå meir gradvis fram i rentesetjinga, skriv Noregs Bank.

Styringsrenta i Noreg er den renta bankane får på innskota sine i Noregs Bank, og ho påverkar dermed i stor grad bustadlånsrentene – som pleier å vere noko høgare.

Positive reaksjonar

Organisasjonen Huseierne påpeikar at økonomien i norske hushald er under stort press på grunn av auka prisar, og at det er fornuftig at Noregs Bank held renta uendra.

– Det er no viktig at den førre rentehevinga får lov til å verke i økonomien til folk før det blir vurdert nye rentehevingar. Renteauken i desember får først verknad i starten av februar, seier forbrukar- og kommunikasjonssjef Carsten Henrik Pihl i Huseierne.

Gjeldsspesialist Sebastian Mikolajczyk i Bank2, som gir lån til folk som har hamna i økonomisk uføre, meiner avgjerda er klok.

– Dagens avgjerd gjer at folk får ein pustepause og tid til å tilpasse seg den nye økonomiske kvardagen med høge straumprisar og galopperande inflasjon, seier han.