Regjeringa opnar for endringar – vil sikre framleis ølsal i fjernbetente matbutikkar

– Eg er ein teknologi-optimist, og eg har sjølv vore i butikkane og sett kor godt dette fungerer. Her må det vere mogleg å finne gode løysingar, seier helseminister Jan Christian Vestre (Ap) til Nettavisen.

I dag er det 150 fjernbetente butikkar i Noreg, der det ikkje er folk i kassa og ein kan handle utan å møte noko betening.

Nyleg har det vore diskusjon om desse butikkane framleis kan selje øl, sider og annan alkohol. Både statsforvaltaren i Agder og Helsedirektoratet vore tydelege overfor NRK på at det ikkje er lov med alkoholsal utan fysisk betening, noko som har skapt uro i bransjen.

Fleire butikkar har sagt at dei fryktar dei må leggje ned.

– Denne saka må vi løyse, seier helseministeren.

I ei pressemelding opplyser Vestre at regjeringa er opne for å gjere endringar i lovverket.

– Dersom det er behov for å gjennomføre tilpassingar i alkoholregelverket vil eg sørgje for at det blir gjort, seier han.

– Viktige for distrikta

Signala frå helseministeren kjem kort tid etter at eit fleirtal i Stortinget beståande av Frp, Høgre, Senterpartiet, MDG og Venstre gjekk saman om å setje ned foten mot ein mogleg stans i ølsal i fjernstyrte matbutikkar.

– I ei usikker tid er beredskap viktig, og lokalbutikkane speler ei viktig rolle. Med dette bidreg vi til føreseielegheit for mange distriktsbutikkar, seier Helge André Njåstad i Frp i ei felles pressemelding frå dei fem partia.

Partia fremja torsdag morgon eit felles forslag der dei ber regjeringa instruere statsforvaltarane til å framleis tillate ølsal i fjernbetente butikkar.

– Fjernstyrte butikkar er viktige for distrikta, men det er også viktig at vi oppdaterer lovverket i tråd med at teknologien utviklar seg. Høgre er lei av at alkohollova har vorte så firkanta at folk mistar respekt for ho, og derfor vil vi ha ei skikkeleg gjennomgang og modernisering av lova, seier Erlend Svardal Bøe i Høgre.

Senterpartiets Erling Sande seier at mange distriktsbutikkar har auka tenestetilbodet i lokalsamfunna sine gjennom fjernstyrte butikkar.

– Det er noko vi vil leggje til rette for. Derfor sørgjer vi for at alkohollovgivinga blir tolka slik at desse butikkane kan halde fram med å utvikle tilbodet sitt, seier han.

– Har komme for å bli

Instruksen til statsråden om å følgje opp saka, vart fremja i Stortinget torsdag. Den skal gjennom behandling, men allereie no er det altså klart at det er fleirtal for saka.

– Her har statsråden sete på gjerdet, medan butikkar i distrikta taper pengar kvar dag, og står i fare for å bli lagde ned. Det viser ei regjering med minimal handlekraft i denne saka. At regjeringa treng ein vaken opposisjon for å gjere jobben sin er ikkje spesielt imponerande, seier Marius Langballe Dalin i MDG.

Sistemann ut i fleirtalet for ølsal i fjernstyrte butikkar, er Venstres Grunde Almeland:

– Fjernbetente butikkar har komme for å bli. Då må vi sørgje for at ikkje omstendelege lover og reglar stikk kjeppar i hjula på ei ordning som fungerer godt, seier han i pressemeldinga. (©NPK)