Ordførarfruene var gudmødrer
Det var Karoline Bjerkeset og Magni Hjertenes Flyum som døypte MF Gloppefjord og MF Eidsfjord på Kattahamrane tysdag.
– Då vil eg ønske Gloppefjord og mannskap hell og lukke, sa Karoline Bjerkeset, før ho sende champagneflaska av garde mot skutesida.
– Høgtideleg og fint
Flaska knuste på første forsøk, til stor applaus frå dei mange som hadde møtt opp på kaia.
– Korleis var det å vere gudmor for denne ferja?
– Det var stas. For meg var dette ei ny erfaring. Det var høgtideleg og fint. Dette er ei ferje som eg kjem til å bruke mykje, og då er det litt kjekt å tenkje på at eg har fått lov til å vere gudmor for ho, seier Bjerkeset.
Ho fekk ein telefon frå Fjord1 for nokre veker sidan med spørsmål om ho kunne tenkje seg denne oppgåva.
– Viktig at ferja går
Same telefonen fekk kona til Eid-ordførar Alfred Bjørlo, Magni Hjertenes Flyum.
– Korleis ser du på å skulle døype Eidsfjord?
– Det blir kjekt. Som Karoline seier så er det ikkje så ofte vi får spørsmål om noko slikt. Å vere ordførarfrue er det ikkje så mykje festivitas rundt. Då eg fekk spørsmålet, var eg ikkje i tvil om at eg skulle takke ja. Det viktige med oppdraget er at vi no set i gang desse fine ferjene. Eg brukar ferjesambandet Anda-Lote ein god del, for eg reiser ganske mykje i jobben. Å vite at ferja går, særleg når vi skal nå eit fly, er for oss ganske viktig, smiler ho.
– Ein spesiell dag
Administrerande direktør i Fjord1, Dagfinn Neteland, understreka at dette var ein spesiell dag for Fjord1.
– Det er ikkje berre ein spesiell dag for oss, men for heile ferje-Noreg. Vi i Fjord1 skal døype våre første elektriske båtar. Dette er opninga for dei elektriske ferjene i Noreg. Det er ein stor dag i vår 160 år lange historie, sa han.
Neteland tykte det var kjekt at så mange hadde møtt opp for å vere med markeringa.