Mann sikta etter dødsfall i Bremanger i helga
Natt til søndag vart ein mann i trettiåra funnen livlaus på nedsida av ein over ti meter høg fjellskrent i Kalvåg i Bremanger. Ein mann er pågripen.
Han er sikta for å ha late nokon etter seg i ein hjelpelaus tilstand, opplyser Vest politidistrikt i ei pressemelding.
Hendinga vart først etterforska som ei ulykke.
Annonse
– I samband med eit vitneavhøyr av ein mann i femtiåra søndag, kom det fram opplysningar som gjorde at politiet vedtok å sikte han, skriv politiet.
Kva opplysningar som førte til pågripinga, vil ikkje politiet gå nærare inn på.
Det var bekymra kameratar av den avdøde mannen som kontakta politiet klokka 05.10 natt til søndag, då dei ikkje fann han heime.
Dei hadde ikkje fått kontakt med vedkommande og ikkje sett han sidan 01-02-tida. (©NPK)
