Loen Skylift vann logo-strid mot Voss Gondol
Selskapet Voss Gondol blir nekta å bruke sin eigen logo framover. Bergen tingrett meiner han er for lik logoen til Loen Skylift.
Loen Skylift saksøkte Voss Gondol tidlegare i fjor, fordi dei meinte at logoen til konkurrenten var for lik. No har dei vunne fram i Bergen tingrett, skriv E24.
I dommen blir Voss Gondol nekta å bruke logoen framover. I tillegg må selskapet betale 1,6 millionar i erstatning til Loen Skylift, pluss 641.000 for sakskostnader til Loen Skylift.
Artikkelen held fram under annonsen.
– Det er ikkje grunnlag for ein slik dom. Det er inga etterlikning der. Vi er overraska og skuffa. Eg trur ikkje siste ord er sagt, seier dagleg leiar i Voss Resort, Øyvind Wæhle.
Han seier dei vurdere å anke.
I Stryn kommune er stemninga derimot betre.
– Dommen er gode nyheiter for alle gründerar som tek jobben og belastninga, med opp- og nedturane, ved å gjere ting nytt og skikkeleg, seier dagleg leiar Richard Grov i Loen Skylift.
(©NPK)