Framstegspartiet får ei historisk låg oppslutning på TV 2 si januarmåling. Her er nestleiar Sylvi Listhaug og partileiar Siv Jensen på pressekonferansen etter at sentralstyret hadde ekskludert leiaren i Oslo Frp 15. desember. Foto: Berit Roald / NTB / NPK

Krisemåling for Frp – Sp og Ap jamstore

Framstegspartiet får rekordlåge 7,4 prosent på TV 2 si januarmåling. Høgre veks mest og er det største partiet i landet framfor jamstore opposisjonsparti.

TV 2-målinga viser at Frp blir hardt straffa etter ein periode med offentleg skittentøyvask og ekskludering av lokallagsleiaren i Oslo. Sist partiet vart målt lågare av Kantar var i 1995. Fallet frå førre månad er på 1,4 prosentpoeng.

– Det er ei veldig dårleg måling, så det er ingen god start på året. Målinga avvik noko frå andre målingar vi har sett. Uansett er det eit altfor dårleg nivå og vi brettar opp ermane, seier partileiar Siv Jensen til TV 2.

Frp er mindre enn SV, som får 7,6 prosents oppslutning på målinga. Dei borgarlege er langt unna fleirtal og får berre 61 mandat sjølv om Høgre med 24,2 prosent er det største partiet i landet etter ein oppgang på 4 prosentpoeng.

Arbeidarpartiet er med sine 22,4 prosent så vidt større enn Senterpartiet, som får ein oppslutnad på 21,7 prosent.

Målinga (endring frå desember i parentes): Raudt 5,8 prosent (-1,1), SV 7,6 (-0,5), Ap 22,4 (+2,0), Sp 21,7 (-0,4), MDG 4,0 (-0,6), KrF 3,3 (0), V 2,3 (-1,7), H 24,2 (+4,0), Frp 7,4 (-1,4), andre 2,2 (+0,3).

(©NPK)