Høgre vil stramme inn handlingsregelen

Høgre-leiaren meiner oljepengebruken har vorte ei kvilepute, seier ho til E24.

Handlingsregelen inneber at bruken av pengar frå oljefondet over tid skal følgje den forventa realavkastninga av fondet, som er rekna til 3 prosent. Då regelen vart innført i 2001, var fondet på 614 milliardar kroner. I dag har det vakse til over 22.000 milliardar. Eriksen Søreide meiner det gjer at 3 prosent av fondet i dag har ein heilt anna betydning for statsbudsjettet enn før.

– Grunngivinga den gongen handlingsregelen vart innført var at oljepengane skulle gå til ting som styrkte vekstevna i norsk økonomi. Det vart beskrive veldig tydeleg den gongen at det over tid var vekstevna i økonomien som var det som ville betale for både velferda og budsjetta, seier Søreide.

Høgre har førebels ikkje bestemt korleis ei innstramming bør gjennomførast. Eriksen Søreide peikar mellom anna på moglegheita for å senke prosentsatsen, berekne verdien av fondet over fleire år eller knytte uttaket til rente- og utbytteinntektene til fondet.

Ifølgje E24s tal utgjorde oljepengebruken 3,2 prosent av statsbudsjettet i 2001. I 2026 er andelen 26,8 prosent. (©NPK)