Frp vil bla opp milliardar til kommunane: – Ingen grunn til så stor fattigdom

– Det er ingen grunn til at vi skal ha så stor fattigdom i kommunane som vi har i dag. Kommunane har så dårleg økonomi at dei ikkje klarer å prioritere dei mest nødvendige tenestene til innbyggjarane sine, seier Frps nestleiar og finanspolitiske talsperson, Hans Andreas Limi, til NTB.

Medan Noreg tener rått på å selje olje og gass til Europa, må kommunar i heile landet gjere store kutt i budsjetta sine. Fleire kommunar har måtta kutte i tilbod til eldre og leggje ned skular for å få budsjetta sine til å gå opp.

I det alternative budsjettet sitt, altså slik Frp ville brukt pengar om dei styrte landet, spyttar partiet inn 5,8 milliardar kroner til kommunane.

– Regjeringa gjer altfor lite når det gjeld eldreomsorg, og når det gjeld samferdsel. Vi ser ei rekke skulenedleggingar på grunn av dårleg økonomi i kommunane. Då må vi styrkje dei tenestetilboda som kommunane har ansvar for, og som betyr mest for innbyggjarane våre, seier Limi.

Vil leggje ned fylkeskommunen

For å gjere det enklare for kommunane vil Frp leggje ned heile fylkeskommunen – forvaltningsnivået mellom kommunen og staten.

Partiet meiner at han i dag skaper mykje dobbeltarbeid, og at kommunane får ein masse med pålegg utan at det følgjer med nok finansiering.

– Og så er det dette innvendingstyranniet med at kommunale planar blir overkøyrde av fylkeskommunane og statsforvaltarar, seier Limi.

Limis partikollega Erlend Wiborg, som sit i kommunalkomiteen på Stortinget, seier at å leggje ned fylkeskommunen også kan innebere å lempe over noko ansvar på staten.

– Kan ikkje det føre til at staten får meir makt over kommunane?

– Nei, fordi dei viktigaste tenestene ønskjer vi å flytte til kommunane, seier han og trekkjer fram skule og helsetilbod.

– Og så er det nokre av oppgåvene som kan gå til staten. Til dømes når det gjeld større fylkesvegar kan det vera fornuftig at dei blir sett i samanheng med resten av vegnettet, legg Wiborg til.

– Eldretilbodet må eksistere

Innanfor ramma på 5,8 kommune-milliardar har partiet øyremerkt midlar til mellom anna eldreomsorg, skuleundervisning og fylkesvegar.

– Vi ser at på enkelte område i dag er det så store manglar at vi er nøydde til å øyremerkje midlar til både eldreomsorg, skule og samferdsel for å rette opp dei manglane som er i dagens system, seier Limi.

Det er særleg eldreomsorga som ville fått eit løft av Frp. Til den blir det øyremerkt 2,5 milliardar kroner. Konkret vil partiet mellom anna starte bygginga av 4000 nye heildøgns omsorgsplassar.

– Men er ikkje problemet at det er for få folk til å ta jobbane i eldreomsorga, særleg i distrikta?

– Jo, men det eine står ikkje i motsetning til det andre. Altså, vi er nøydde til å sikre at vi har eit tilstrekkeleg tal pleieplassar. Fordi vi blir fleire eldre, og heldigvis er vi friskare og friskare sjølv i høg alder. Men på eit eller anna tidspunkt er det ein del som treng den typen omsorg, og då må det tilbodet eksistere, seier Frp-nestleiaren.

På utdanningssida viser han til at det er fleire søkjarar til sjukepleiarutdanninga enn det er plassar, slik at talet på studieplassar må opp. (©NPK)