Fleire vil ta koronavaksine, men éin av ti seier framleis nei

Seks av ti nordmenn er positive til å ta vaksine mot koronaviruset, ifølgje ei ny undersøking frå Norsk koronamonitor.

12 prosent seier nei til å ta vaksinen når han kjem, medan kvar fjerde nordmann svarer at dei ikkje veit.

Det kjem fram i Norsk koronamonitor frå Opinion, der 8.500 nordmenn er spurde om dei vil ta ein vaksine mot koronaviruset når han er klar.

Andelen som ikkje vil ta vaksine, har falle med 4 prosentpoeng sidan november, medan andelen som seier ja, har auka med 3 prosentpoeng.

– At ein godkjend vaksine berre er veker unna, gjer nordmenn meir villig til å ta han. Men alfa og omega er at han er trygg, seier seniorrådgivar Nora Clausen i Opinion.

Den første vaksinegodkjenninga kan komme rundt nyttår, og dermed vil ho vere klar for Noreg kort tid etter.

– 1,2 millionar nordmenn kan då få vaksinen i første omgang. Det er 70 prosent av alle i risikogruppa og folk som jobbar med utsette grupper, sa helseminister Bent Høie (H) på pressekonferansen til regjeringa fredag.

(©NPK)