– Farten skal ned – naudsynt for å få ned talet på dødsulukker

– Altfor mange døyr eller blir hardt skadde i trafikkulukker, fordi farten er for høg. Fart er medverkande faktor i kvar tredje dødsulukke, seier Guro Ranes, avdelingsdirektør for trafikktryggleik i Statens vegvesen, til Nynorsk pressekontor.

Ho reknar med at det kan bli lågare fartsgrenser, fleire kontrollar og fleire fartsreduserande tiltak. I tillegg blir det auka fokus på kampanjar for meir trafikksikker framferd i trafikken.

– Målet er å berge fleire liv og avgrense skadeomfanget av ulukker i trafikken, legg ho til.

Samstundes kan Ranes slå fast at det er stadig fleire trafikantar som held fartsgrensa. For 20 år sidan var det 45 prosent som heldt fartsgrensa, medan talet no er 62 prosent.

Fartsgrenser

Den nye « Tiltaksplan for trafikktryggleik på veg 2026-2029 » inneheld 177 tiltak fordelte på 14 innsatsområde, og legg opp til samarbeid mellom Statens vegvesen, politiet, Trygg Trafikk, Helsedirektoratet, fylkeskommunane og storbykommunane, pluss rundt 20 interesseorganisasjonar.

Guro Ranes seier at dei skal vurdere alle fartsgrenser i tettbygde strøk opp mot risikoen for alvorlege ulukker. Tidlegare har det vore vanleg å gå ut frå 50 km/t som normalgrense i tettbygd strøk, og så måtte ein ha gode argument for å få sett ned fartsgrensa ytterlegare.

– No byrjar vi på 30 og så må det argumenterast for at det skal bli 40 eller 50. Også utanfor tettbygd strøk skal vi vurdere fartsgrensene, og eg reknar med at fleire strekningar vil få 70-soner, seier ho.

Målretta mot nullvisjon

Det er sjuande gong det blir utarbeidd ein fireårig tiltaksplan for trafikktryggleik, og arbeidet med planen har utvikla seg til å bli ein svært viktig arena for samarbeid.

Samferdselsminister Jon-Ivar Nygård (Ap) ser på tiltaksplanen som ein grunnstamme i det norske trafikktryggingsarbeidet.

– At aktørar på tvers av sektorar og forvaltingsnivå jobbar målretta saman og forpliktar seg til tiltaka, er unikt og ei viktig årsak til at dette samarbeidet fungerer så godt her i landet. Eit breitt spekter av kunnskapsbaserte tiltak for svært viktig i arbeidet for nullvisjonen, seier han i ei pressemelding.

Nullvisjonen er eit mål om at talet på dødsulukker i trafikken skal ned på null.

Mange innsatsområde

Tiltaka som blir foreslåtte i planen omfattar mange innsatsområde: For gåande og syklande, motorsyklistar, barn, ungdom, og eldre, beltebruk og sikring av barn, fart, rus og fleire andre felt.

Den nye tiltaksplanen er ein del av arbeidet med å nå målet i Nasjonal transportplan, maksimalt 350 drepne og hardt skadde, og maks 50 drepne, i vegtrafikken i 2030. Dette vil vere nær ei halvering frå nivået i 2024.

Omgrepet hardt skadd blir brukt om dei som er så alvorlege skadde at dei må overnatte på sjukehus.

– Regjeringa sitt mål for 2030 er svært ambisiøst, og det krev ein betydeleg innsats og eit mangfald av tiltak. Eg reknar med at høyringssvara vil føre til at vi får endå kraftigare tiltak som kan hindre alvorlege ulukker, konkluderer Guro Ranes.

Høyringsfristen går ut 31. desember. Så skal innspela vurderast, slik at ein ferdig plan skal leverast til samferdselsministeren 1. mars 2026. (©NPK)