Dieselprisar over 30 kroner ved 650 stasjonar

På 34 av desse stasjonane vart det registrert prisar på minst 31 kroner per liter, ifølgje Syver Orhagen, som er dagleg leiar i Drivstoffappen, skriv TV 2.

– I dag har vi registrert dieselprisar over 30 kroner literen ved 650 ulike stasjonar, og talet har halde fram med å stige gjennom ettermiddagen. Det er svært uvanleg at prisen er så høg ved så mange stasjonar. Dette er eit hopp vi ikkje har sett noko i nærleiken av, seier Orhagen.

Gjennomsnittleg dieselpris var torsdag 28,48 kroner per liter, som er ei dryg krone høgare enn dagen før.

Prisauken kjem av både at avgiftene er tilbake på normalt nivå, uro i Midtausten og knappleik på diesel.

Stortinget innførte eit mellombels kutt før påske i 2026 for å skjerme forbrukarane mot prissjokk. Dette kuttet vart oppheva 1. september. (©NPK)